Agur bat Txomin Peillen Karrikaburu-ri

Txomin Peillen Karrikaburu !
Bada 20 bat urte, gure ikusmin sorpresatuentzat, zure ezpiritu zorrotza denena den Hatsaren Liburuan sartu zinuela ! Zure burutazio libro eta libertarioek : poesiarekin ere, biologia(bizia eta hitza) adierazi nahi behar izan zuten. Zure olerkiak, gure herrian, mundu zabalean bezala, humanitatearen plegurez , minez, hobenez bete zinituen eta orai hor egonen dira, guretzat, zure oroimenez !.
Joan zira neguko egun hotz baten garaian ,zure hain maite zinuen Xiberoko Ligi Athereiko lur eremuetan, urtzera. Uste dut, bizidunen artean, askok susmatzen dugula noiz desagertuko garen , bai pentsatzen dut, zuk ere, noski, bazinuela horretaz jadanik ideia bat , zeren azken olerki hau igorri baizeniguzun :

Izotza

Izotza haizelako

Elurraren ide,

ez duk ezagutzen

lohien ahalge.

Eguzkia helduta

belarrak argitzen

diamante argiak

haietan pizten.

Hi bezala bagina

jendekiak urtzen.

Agur ,zuri , betikotz ,Txomin Peillen Karrikaburu !

Auxtin Zamora

*****************************************************************************

Durangoko Azoka

Ongi iragan zen 2022ko Hatsaren poesia liburuaren aurkezpena Durangoko azokan, eta Hatsako lagun batzuk bildu ginen... 2022ko hatsaren poesia aurkezteko 24 urteotako ibilbidea eta datorren urteko erronka berria, 25. hatsaren poesia... gonbidatu nuen jendea parte hartzera, eta gero Matxalen Bezos eta Leire Zabala aurkeztu nituen eta Matxalenek bere haikuak irakurri zituen eta Leirek GURE HATSA kantua abestu... polita guztia !

Ainara Maia Uroz..

Ainara Matxalen eta Leire

Matxalen, Josu, Inaki ,Leire, Sabin,Ainara

Auxtin Zamora-ren "Su hatsa "

Senpereko Mediatekak, bere apaletako liburuen artean “Su hatsa” erakusketa ezagutzera gonbidatzen zaitu.Auxtin Zamorak idatzitako poema hautatu batzu hor aurkituko dituzu bai eta ere berak egindako aluminiozko eskultura artistiko batzu.

Erakusketa, urriaren 21etik azaroaren 21era iraganen da. Bisitak : Mediatekako ordutegiaren arabera egin ditaizke

Hatsakideeri idekia den gomita:

"Dominique Idiart, Senpereko Jaun Auzapezak, eta, Xabi Camino, Kulturako Axuantak , Auxtin Zamorak sortu« Su hatsa » erakusketaren karietara, atseginez gomita hau luzatzen dizute, adixkidetasunezko edariño bat , Mediatekan, elkarrekin, azaroaren 15an, 19:00etan,partekatzeko "

ESTREINALDIA SENPEREN‌

"Hatsa"ko kideei

‌Senpereko mediatekan , nere "Su hatsa" erakusketaren estreinaldiaren kari, Abendoaren 15ean, 35 pertsona, giro hoberenean biltzeak, Auzapez , Herriko hautetsi, Senpertar eta familikoen artean, zorion erraldoi bat eman dit. Mila miletan eskerrak deneri . Hatsa-kideen presentzia, ere, ezin estimagarria izan zait. Askok ezin zuten gure erdian izan, baina hori ulergarria da , bizian, ditugun konpromisoak, hain dira ugari ! Merezimendu haundia zor diotet beraz Senperera, urrundik etorri diren guzieri: Nicole Etxart, Josu Jimenez-Maia, Antton Kazabon eta Karmele, Ainara Maia-Urroz, Juankar Lopez-Mugartza ,Eric Traonmilin, eta Sabin Oregi-ri.
Orai, Erakusketa, Azaroa honen 21 a arte idekia izanen da, eta, gero pentsatzen dut beste Euskal Herriko biblioteka batzuetan oraino ikusgai izanen dela . Anartean, urtea bururatu baino lehenago, olerkiak idaztera gomitatzen zaituztet , pentsatuz 25 garren liburu bat, kementsuki, elkarrekin, Euskal Poesiaren ohorez, oraino ixkribatuko dugula **

Auxtin Zamora
** Ainarak, Abendoaren hastapenean , usaiako olerki eskaera igorriko dizute

Nere familiako zonbaitekin , estreinaldi egunean .

Josu Jimenez-Maiaren argazki zonbait hemen:https://twitter.com/itxaurdi/status/1592621582257905664

************************

Alvaro Mundiñano Gartziandia, margolaria eta bera ere Hatsakidea, bere lanak Larraldean erakutsi baitzituen, joan zaigu mundu honetatik. Argazki honetan ikusten da ere, aurten zendu zaigun, Koldo Zubeldiaren aurpegia Bihotzez agur, bioi !

Juankar Mugartzaren hitza

Gau honetan(2022/10/28) Alvaro Mundiñano Gartziandia etxarriarra joan zaigu mundu honetatik.

Alvaro Mundiñano, margolariaz gainera, langilea zen; gazte-gaztetandik Antsoaingo karrozeria tailer batean hasi zen lanean eta etxean bere soldataz laguntzen. Mexikotik itzultzean, Iruñeko beste tailer batean aritu zen gaixotasun sendaezin batek erretiratu zuen arte. Langilea izateaz gainera, iraultzailea ere izan zen eta gizarte mugimenduetan eta ezkerreko erakunde eta alderdi politikoetan parte hartu eta bere konpromisoa erakutsi zuen: klandestinitatea ezagutu zuen garai batez, eta, beste garai batean, berriz, zinegotzia izateak dakarren ardura. Langilea eta iraultzailea izateaz gainera, artista ere bazen. Bere lanetan Sakana beti present dago. Beriain mendia, bereziki. Sakanako larreak eta noizbait hustu ziren Arañazko herriak, Lazkoz, Maiza, Erdozia, Mundiño edo Mundiñano... Langilea, iraultzailea eta artista izateaz gainera, euskaltzale amorratua ere bazen; gaur euskarak hiztun garrantzitsu bat galdu du, euskara ahulago dago bera gabe, leku guztietan euskara zabaltzen eta indartzen saiatzen zelako. Euskara maite zuen eta bere erakusketetan eskuorriak eta beti euskaraz zeuden, bere margoen tituluak bezala, beti euskaraz, beti euskararen alde. Langilea, iraultzailea, artista eta euskaltzalea izateaz gainera, sakandarra zen, Sakana maite zuen bihotz-bihotzez. Mexiko bihotzean zeraman etxarriarra zen, babes bila noizbait alde egin behar izan zuen einara eta herrira itzultzean herriko kaleak, iturriak eta jendeak erretratatu zituena. Baina langilea, iraultzailea, artista, euskaltzalea eta sakandarra izateaz gainera, adiskide on bat zen, bihotz handikoa, onesta, zintzoa, jatorra, beti laguntzeko prest. Bere margoak erakutsi zituen duela justu urte bat Iruñeko Plazara elkartean, eta saldu ziren koadroak Alde Zaharraren historiari buruz auzo elkarteak egin behar zuen liburu baten argitalpenean laguntzeko egin zituen. Zertarako nahi zituen margoak etxean izan? Nahiago zuen margoak herriko jendearen eskuetan egotea. Orain berriro joan zaigu, lehen Mexikora, orain inork ere ez daki nora, eta betetzeko oso zaila den hutsune handi bat sortu du Sakanan, Senperen, Coatzalcoalcosen, Elortzibarren eta Iruñeko Alde Zaharreko kaleetan. Nork egingo ditu orain zuk egiten zenituen gauza horiek guztiak ??

Juankar Lopez-Mugartza

https://ms-my.facebook.com/AZproyectoekimena/videos/alvaro-mundi%C3%B1ano/1043178099848455/

https://youtu.be/fuHVzUXGOVY

**********************

Koldo Zubeldia, gure" Hatsa"kideak,

gaur, (2022/10/02), beste bide bat hartu digu !

Koldoren bozak beti hunkitu izan nau . Ez dakit, nungo bere barneko gunetik ateratzen zitzaion hain sakona eta ozena zaukan ots sentikorra . Uste dut bere erran nahi poetikoen hitzak , jakin gabe, bihotzeko musika batekin janzten zituela.

Kasik egun guziez, bere azken gaixotasun une garaian, deitzen ninduen . Nago, ean, oraino bizi nintzen jakiteko, egiten zuen hori, edo, beharbada , nork daki, bera ere , bizi zela, frogatu nahi ninduelako .

Bere azken deia , eritexean zelarik egin ninduen , bere inguruko erizain eta familikoak behartu zituen telefono tresna ahora hurbiltzera, baina bere hitzak aditu ezinak izan nituen, eta, jakin nuen orduan , bere olerki batean idatzi zuena nahi ninduela erran :

''Ez du, egoera honek, merezi , nere nortasuna amiltzerik,

ez du merezi itotzerik.....

lasai lasai ibiliko naiz hemendik aurrera.....''

Bai... bai... lasai, ibili Koldo ! Orai, bidea, urdin urdina aurrean ikusiko duzu !

Auxtin Zamora

"Hatsakide zonbait, Koldoren ehorzketa egunean , Maria Karmen ,bere arrebarekin

**************************

"Hatsaren Poesia"ren Tailerra

Juankar Mugartza-rekin

Aurtengo leloa hauxe izan liteke: "Zumalakarregi eta Xaho, edo Nafarroara egindako bidaia euskaldunen matxinadaren garaian"

" Zumalakarregiren Atariraino ibilaldi bat egingo genuke eta Agosti Xahoren lanaren pasarte batzuk gogora ekarriko genituzke, horien gainean gogoeta egin eta poesiaren hegaletan irudimena askatzeko"

Iruñean urriaren 29an, larubatarekin

11:00etan bilduko gara Gaztelu Plazako Kioskoan eta segituan kafea Iruña Kafetegian.

11:30 Zumalakarregiren atarira bixita

14:00etarako bazkaria. Iruñeako Geltokin, 14:00etan.(Bazkaltzeko Lekua :15 lagunentzat.)

. 16:00etatik 17:00etara idazteko unea “La Villavesa” bulego zaharrean, Geltokin bertan

-17:00etan amaiera

Bazkaria :25 Euro-Kafea Juankarrek eskainia

Bazkariarentzat, izenen ematea behar beharrezkoa da . Izenak igorri honera : olerkibilduma@sfr.fr)

**************************

************************

Olerki-tailer bete bete bat

Aitor Antuñano, Josu Jimenez-Maia, Marisa Arruabarrena- Elizalde, Sabin Oregi-Zarautz, Ainara Maia-Urroz, Auxtin Zamora-Durruty, Eneko Apaolaza-Etxeberria, Nicole Etxart

Abuztuaren 27a, Larunbat goizean,

Josu Jimenez Maia-ren gidaritzapean,Sabin Oregik lagundurik,
bildu gira, 8 bat kide, "eguzkiaren sortaldeko inperioa" den japoniako gerezi eremu loreztatu poetikoetan barna, bide egiteko.

Gure gandik hain urrun diren "Nipon"darren olerkigintzari gertuarazteko,jakitate eta aditasun apasionatu bat dauka, Josuk ! Asko irakatsi digu, haiku, tanka, zuihitsu eta beste hainbat hitzen mamietan sartuz.Ikusi hemen: Ezkabako talaiatik: Zuihitsua liburuaren aurkezpena Larraldean (itxaurdi.blogspot.com)

Nunbait azaldu zigun,ere, beren formulazioek gure mendebal poesigintzan bezala, neurketak, erritmoa, musika erabiltzen dituztela, eztetismo baten aurkitzeko, baina ezberdintasuna haundi bat ere daukatela gure sentsibilitate judeo giristinoaren

funtsari konparatuz.Beste mundu baten sumatze bat !

Gogo onez, 8ek, bana haiku elkarrekin egitea onartu ginuen ,eta, egia da, ez garela antzu egon! Gure emaitzak Hatsaren 26 garren bilduman agertuko dira!

Arratsaldean, gure gogoetak joan ziren Lierni Azkargortari buruz! Sendatu dadila ahal bezain fite, jadanik asmatua duen olerki tailerra gurekin partikatzera etortzeko. Laster arte beraz Lierni !

Egin behar zen tailerraren ordez, "Ekaitz sortzailea"labur metraia(ikus bere aurkezpena bloge honetan) erakutsia izan zen.

Ixiltasunezko eta geldotasunezko une bat iragan ginuen, Alexandre Parizet zinegile gaztearen lehen obra ederrari begira.

8 pertsona, 8 plazerezko oren(10 etarik 8ak arte) ! Olerki-tailer bete bete bat !

Auxtin Zamora

Egun guzian, Iñaki Bastarrikak eta Maite Ramosek, beren aquarela eta pinturekin, Japoniako giro inkonziente batean busti gintuzten. Esker mila eta gehiago beraieri !

*****************************************************

*********************************

"Ekaitz sortzalea",

"Ekaitz sortzalea", titulua, duen, labur metraia hau, batez ere, linguistiko ikuspundu batetik, sortu zen, Euskal Herrian diren, Euskal hizkuntza eta bere indar espiritualak , irudi zinematografiko eta kontenplatibo baten bidez, nabarmentzeko. Euskal ipuin eta kondairetatik inspiraturik , bereziki beren sorginkeriarekin mantendu duten eraginetarik hurbil, filma labur hau saiakera bat da, mendiek eta ozeanoak talka egiten duten eskualde baten bihotzean dagoen magiaz elikatua. Nunbait, airean , edoien ondoan, gelditzen den, hunkitu ezina ,eta ,eten gabe zintzilik den, sentsazio bat bezala irudikatu nahi duena.

Ahozkotasunaren bitartez, une fantastiko bat transmititzen den bezala, kondalarisa batek, gau beila batean sutondoan bildu direneri, nola, ipuin bat, entzunarazten duen, pelikula honek, horrela, leize-zilo baten barnean abandonatua izan den , Maria, umetxoaren istorioa biribiltzen digu.

Irudietan ikusten diren tokiak, pertsonaiak baino lehenago jadanik hor ziren, ez antzeztoki baten gisan, baina beraieri,beren artean gertatuko zaienaren sortzaile gisa.

Euskal herriko barnealdean eta itsas bazterrean filmatua, "Ekaitz sortzalea", modu bat da, batez ere, paisaiak gorputzekin lotzeko, eta , ozeanoaren olatuetan murgilduta dagoen begiradaren misterioa argitzeko. Misterio hori, filmaren iraupen guziaren barnean, kontalarisak derama gero eta gehiago hurbiltzen ari den ekaitz bat bezala

"Ekaitz sortzalea", labur metraia honekin nahi izan da 1930 hamarkadan garaian bizi izan den Jean Epstein zinegilea omendu. Jakina, honek zuela Bretainiako itsas kostaldeko ekaitzetan, kristalezko bola baten laguntzaz, kontrolatzeko gai zen ,"Le Tempestaire" deitu gizon baten existentzia, "La Boule du Tempestaire" pelikulan kontatu.

Azken finean, uste dut Alexandre Parizetek, obra honekin erematen gaituela , Bretainiako paisaietarik Euskal Herriko eremuetara, eta, hori, bien arteko Fantastikotasun arlo arraro bat agertaraziz.

Auxtin Zamora (Alexandre Parizet-ek inspiraturik)

*********************

"Ekaitz sortzailea", filmaren projekzioa, Larraldean , bakarrik 6 pertsonen aintzinean iragan zen . Nunbait, neure barnean, pena haundi bat daukat , ikusiz, filma hori zoin ederra zen ! Bere egileak ere, ulertu ditaike, frustrazio mingarri bat ukan duela.

Zer egin, zer erran ? Kultur eremua ez da erraza bai bere egileentzat bai bere mamiaz elikatzen direnentzat , baina hala ere pertsona bakotxa ,sinesten dugulako , mundu erraldoi bat dela, uste dut, oraino , poesiazko ekintzetan , jarraitu behar dugula , bakar batekin edo batentzat balitz ere !

Auxtin

Mixel Mendiboure, Elixabet Andueza, Maria Hacala '(Aktorea), Auxtin Zamora, Alexandre Parizet(Filmaren egilea) ,Mixel Hacala

*********************************

27 an Larraldean bertan bazkaltzea posible da.

Postrea eta kafea eskaintzen dugu,

baina edatekoa eta jatekoa nor berak

beharko du ekarri.

Izenak eman behar dira

http://www.elinberri.eus/2022/08/22/hatsaren-poesia-abuztuak-27-senpere/

*********************************

‌Olerkari maitea:

Lierni Azkargorta, osasunez, garai honetan, ez ongi izanez, 27an obratu behar ginuen 'Haurzaroaren ganbara' olerki-tailerra, geroxeago, beste egun batez, moldatuko dugu.
Edozoin gisaz ordezko olerki-tailer bat, iraganen dugu, eta gure sustengua Lierni-ri igorriko.
Tailerraren gaia hau izanen da:
"Ekaitz sortzalea" ,

eta, inspirazioari hastapen bat aurretik emateko,
hona hemen argazki bat.
Egon denok osasunean! eta etorri 27an Larraldera!

Auxtin

PS Oroitu Josu Jimenez-ek ere, 27an, bere "Zuihitsua"liburuaz hitz eginen digula eta Inaki Bastarrikaren eta Maite Ramosen erakusketa
ikusgai dela, abuztuaren bukaera arte...

Hau geroxago egituratuko dugu

HAURTZAROAREN GANBARA

Gaia: haurtzaroak indar handia du gizakion bizitzan. Bart gauekoak aise, baina gure aitona-amonei zailki ahazten zitzaien euren antzinako haurtzaroan bizi izandako hainbat xehetasun. Esango nuke, haurtzaroan izan ditugun bizipenek, izan gozoak zein mingotsak, era nabarian urratzen dutela bakoitzaren barne mundua.

Askotan imajinatzen dut, edukiko dugula gure anatomian, “emozioen organo” bat, esponja baten moduko mamia duena; harroa. Baina aldi berean, ganbara bat bezalako barrunbea ere badena; sendaturiko orbainak bezala, irekiriko zauriak ere, bere jarioan gordetzen dituena; jaiotzen garen lehen unetik, hiltzeraino jasoko ditugun maitasun zein minak absorbatzeko gaitasuna duen ganbara gorri-gorri bat. Oroitzen ditugunak, oroitzen ez ditugunak, kontzienteak, inkontzienteak… hainbeste denboran haustu ere egin zaizkigun “zera” horiek guztiak, gordetzen dituen ganbara bat.

Askotan ordea, ez dugu ganbara horren atea irekitzeko giltzarik; giltzak non gordeak ote diren ere, oroitu egin behar. Egunerokoan ez dugu barru-ahalegin horretarako denborarik. Honekin esan nahi dut, garunarekin ere konektatua dagoela gure ganbara hau; oroitze lanak ere egin beharko ditugula, alegia.

Tailerraren helburu nagusia, gure barruan, haur gineneko garai haiek, izan garai panpinak zein piztiak, hau da, emozioen erreinuan era kontzientean gorde ditugun uneak, elkarrekin partekatu, eta azkenik, sortzen zaiguna poesiara eramatea izango litzateke; barruetako emozio horiei, beldurrik gabe atzamarka egitea, alegia.

Ohar gisara, azpimarratu, bertan hitz egindakoek bertan geratu beharko dutela; bertako azalpenak guztiz konfidentzialak izan behar dute, eta inongo momentutan ezingo dira, partekatu ditugun kontakizun pertsonalak, arratsalde horretan sortuko dugun eremu pribatu horretatik kanpora atera.

Partaideak, saiora, bere haurtzaroa era nabarian markatu duen zerbait ekarri dezake, eta ekarririko objektu edo pasarte horiek, nahi bezala azaldu. Elkarren artean partekatuz joango gara. Izan daiteke: argazki bat, kantu bat, disko ala liburu bat, marrazki bat… edo besterik gabe, aspaldiko oroitzapen edo pasarteren baten kontaketa. Bat edo gehiago ere izan daitezke. Alaia edo tristea izan daiteke. Guztia kabituko da. Gauza da, norbere haurtzaroan pisu handia duen zerbait izatea.

Ea ba, haurtzaroaren ganbarara igo, eta “emozioen organo” gorria, katuaren atzaparrez urratzen dugun. Indar handiko saio eder bat irekiko zaigu. Eta sortzen dena sortzen dela ere, bere horretan izan badelako, ez izan zalantzarik: poesia izango da.

Lierni Azkargorta Ruiz de Egino.

ERAKUSKETA

Iñaki Bastarrika-ren, "Azietak" deitu ,bere obraren aurkezpena

Azietak

Hitz batzuk nahi nituzke erran erakusketa honen inguruan. Lehenik, azukre-kainaberaz egindako plateretan margotutako lanak direla. Hortaz, azietak edo platerak dira paperezkoak, eta paper hori egina da azukre-kanaberarekin. Paperak margoa ongi hartzen du.Margoak dira tinta beltz txinatarra, nogalina, kurkuma-ura, eta bertze.

Azietak egin dira gogoak eman ahala, hitzik edo olerkirik kontuan izan gabe. Batzuk koloretsuak dira, bertze batzuk ez, zuri-beltzean eginak gorri tantatxo batekin.

Olerkiak, izan, Hatsa elkarteko olerki bilduman parte hartzen duten olerkarienak dira, eta olerki horiek azietekin parekatzeko lana, azieta bakoitzari olerki bat edo olerki bakoitzari azieta bat emateko lana Auxtin Zamorak hartu du eta margolariari laket izan zaio emaitza.

Orai, espero dut zuen, ikusleen gustukoa izanen dela erakusketa hau, edo bederen ez gogoz kontrakoa, eta aurkitu edo atzemanen duzuela, agian, atsegin zaizuen olerkirik eta margorik.

Ongi izan zaitezte!

Bast 2022

Maite Ramoz-en euskal herriko txoko gordeen margoak

Maite Ramos, Iruñean jaioa, 1967an, eta Berriozarren bizi dena. Lehen Hezkuntzako irakaslea izatez gain, margolaria ere bada. Koadro-bilduma honetan Euskal Herriko txoko batzuk daude ikusgarri, hamabortz osotara, akuarela teknikaz eginak.

Lehen, beste bilduma batzuk erakutsi ditu Uharten, Berriozarren eta Auritzen, besteak beste, Orizuru galerian, Baionako Euskal Museoan eta Atarrabiako Pilategian, baita hemen ere, Senpereko Larraldean. Hainbat urtez, 12 cm-ko erakusketa kolektiboan parte hartu du, Pasaiko Udalak Arguedasekoak, Hendaiakoak eta Lisboakoak antolatua. Abuztuko hil honetan ere Iruñeko Geltoki-n badu erakusgarri Harrien ametsak izeneko erakusketa.

Gainera, hainbat liburu ilustratu ditu: Exilio en las algas, Gerezi garaiko haikuak, Orbel azpiko haikuak, Aingura eta arrangurak, Zuihitsua eta album ilustratu bat, Hiru miru, berriki gaztelaniaz eta arabieraz ere atera dena.Era berean Senperen argitaratzen den 2020ko Hatsa poesia-aldizkariaren azala ere egin zuen, eta, era berean, Baionan argitaratutako Maiatza literatura-aldizkarian ere kolaboratu du bere irudiekin.

Maite Ramoz-en :''Infernuko errekako errota

Ainara Maia Amaiur-ren

https://xorinokantharia.wordpress.com/2022/08/16/donostian-2022ko-agorrilaren-16an-asteartea-astelehenez-mozorroturik/

''Hatsa''ren olerki tailerra

Matxalen Bezos-Arketa-rekin

Arkitektoniko Olerki Tailerra-ren oiartzun labur bat

Beti bezala, oraikoan ere, Matxalen Bezoz Arketarekin iragan dugun tailerra , giro berezi berezi batean bizi izan dugu. Ikusiz, Matxalen, Lierni, Sabin , Unai eta Auxtinen artean, zonbat burutazio egin ginituen, (kasik 6 orenez), uste dut, nunbait , espiritualki, Larraldeko lehengo arkitekto guziak gure artean ginituela .Egia da aktualitateko egoera sasitsuak ere hitzen ateratzera lagundu zigula. Hainbat dira eztabaidagarri gaiak , munduan , bai bereziki ere Euskal gizartean. Azken finean, etxera sartu gira olerkirik idatzi gabe, baina ez kezkatu, hitzematen dugu, datoren 'Hatsa'ren olerki bildumarako , gure elkar arteko hitzen plateratik hartutako bost axola sakonekin , norberak, testo-olerki bat idatziko eta igorriko duela !!! Denontzat, Auxtin

PS Datoren Tailerrak , Larraldean, Abuztuaren 27an

Goizean : Josu Jimenez Maiarekin

Arratsaldean ; Lierni Azkargorta Ruiz de Egino rekin,

Senpere Larraldean

Arkitektoniko Olerki Tailerra

Matxalen Bezoz Arketa-ren ardurapean

BASERRIAREN EUSKARRIAK

(Ezaugarri arkitektonikoetan murgilduz)

EKITALDIAREN HELBURUAK

- Poesiaz gozatzea.Giro ona sortzea.

Euskal herriko (baserrietako)historian eta arkitekturan barna murgiltzea

BALIABIDEAK Materialak:

Koloretako kartulinak edo folioak.

Sobreak.IrudiakGuraizeak.

Arkatza*******************************************k, boligrafoak…

Espazialak:Senpereko Amotz auzoko “Larraldea” baserria izanen da olerki tailer hau egiteko aukeratu dudan lekua.

EKINTZAREN GARAPENALehenengo zatian “Larraldea”-tik ibilbide bat hasiko dugu. Ezaugarri artitektonikoei erreparatuko diegu eta hortaz baliatuko gara herriko historia ezagutzeko.

Pixkanaka-pixkanaka baserri osoa zeharkatuko dugu eta puntu konkretu batzuetan irudi edo hitz bat duen sobre bat izanen dute parte hartzaileek.

Bigarren zatian poema idazteko parada izanen dute, baina kontuan izan behar dituzte aurretik banatutako hitzak eta irudiak.

Ondoren, hirugarren zatian, olerkari bakoitzak bere olerkia idatziko du eta noski, gero, errezitatu.

Azkenik, taldeari bi aukera proposatuko dizkiogu:

Idatzitako testu guztiekin testu-elkartze bat egin dezakegu.

Testu guztiak diren bezala izenpetuta uztea eta hatsaren poesiara bidaltzea.

DATA eta ORDUA 2022ko ekainaren 25ean, arratsaldeko 15:00etan.

*******************************************************

ILUNABAR LITERARIOA LASARTEN

*****************************************************************************************************

Efemeroa biluztera....

Jakes Ahamendaburu , gure hastapeneko Eihelarreko Hatsakidea, gau luzearen barnean, Efemeroa biluztera joan zaigu.

5 urtez, igorri dizkigun idatziak, sentimen haudikoak izan ziren, bai, eta, euskara aberats aditu batean, oso landuak,
2000 urtean, Olerkariez egin zigun definizioak asko hunkitu gintuen .Hau zioen :
-Olerkariak, ustegabeko hainbat maitale anonimoen itzalean, inongo bakerik onartu gabe, loretik lilia berexiz, efemeroa gauero biluztuz, mundua eta gizona ditu azpikoz gain kantatzen. Poesia bizitzaren izuran datza, ametsa hastear den unean, tristura eta atsedenaren mugetan, oroitzak ezbaia irensten duen gunean...

Jakesen oroitmenez, hona ere bere olerki bat asko maite duguna:

Izarren gordean,

iletxo bat

zurea, nerea

eta iñorena

Izaren gordean

zetatxo bi

zurea,nerea

ez eziñarena

Izaren gordean

hiru musu

zurea, nerea

eta gauarena.

Izaren gordean bezala, izarren agerian : gau on, eta, bidaia on Jakes... !

Auxtin Zamora

**************************************************************************************

Galdakaoko liburu azoka
Eguna: Maiatzak 14
"Hatsaren Poesia"ren aurkezpena : 14:00etan
Tokia: Galdakao, Gurutzeko plazako karpan (udaletxe ondoan) Google maps: https://goo.gl/maps/4ncMu1YTT69pSDjBA

Hatsaren Poesia 2022

Olerkari maitea:

Datorren urteko 24. "Hatsaren Poesia" olerki-bilduma liburua elkarrekin sortzea proposatzen dugu beste behin ere, Durangoko Azoka gainean dugun honetan; bide batez erran, heldu den abenduaren 8an arratsaldeko 18:00etan aurtengo liburuaren aurkezpena eginen dugula Durangoko azokaren Ahotseneako Musika-eskolaren gunean. Gonbidaturik zaudete!

Beti bezala, itxaropen handi batekin pentsatzen dugu olerkari aunitzen oihartzuna ukaitea datorren urteko HATSAREN POESIA liburuan, eta posta elektroniko honekin batera, oroitu nahi dugu datorren urteko sar-hitza aspaldi hatsakide dugun Joseba Aurkenerenari egokitu zitzaiola zoriz, eta datorren urteko liburuaren azalerako edozein proposamen jasotzeko prest gaudela.

Zuei denoi ere parte hartzeko gonbidapena zabaldu nahi dizuet, eta honako hau galdegiten dautzuegu:
1. Olerki bat bederen igorri, edo bizpahiru gehienez ere bidal diezagukezu, eta horrekin batera biografia labur bat, gehienez ere lauzpabortz lerro. Horrez gain, berria bazara Euskal poeten bilgune honetan, labur-labur idatzi biografiaren azpian zer den zuretzat poesia.
2. Zure aurpegiaren argazki bat ere nahi genuke.

Azken epea bidaltzeko 2022ko Urtarrilaren 15a izanen duzue, eta bi modu duzue horretarako:
1. helbide elektroniko honen bidez: hatsarenpoesia@gmail.com
2. posta arruntez: Eliza kalea 10, 5. ezker, 20302 Irun, Gipuzkoa, Euskal Herria.

Baldintzarik gabe eta zentsurarik gabe olerki guziak apirilaren lehen igandez, ohitura den bezala, 2022ko apirilaren 3an, 'Hatsaren Poesia' egunean publikatuak izanen dira, eta egun hori behin-behinekoz gordeko dugu liburuaren aurkezpena egiteko.

Zure inguruan diren olerkari idazleei mezu hau ZABALDU, otoi! Denontzat tokia izango da liburuaren barnean!

URTEXAHARRA ONTSA BUKA ETA HOBEKI HASI URTEBERRIA!

Hatsa elkartea
Oxtikenia
64310 Senpere,
Lapurdi, Euskal Herria

Udaberriko olerkari maitea:

MARTXOAREN 27AN IGANDEAN!

11:30etan Elkarretaratzea

12:00 ‘’Hatsaren Poesia 2022'' Liburuaren aukezpena
13:00 Aperitifa eta zizka-mizken bazkaria norberak ekarri jan-edanekin.
16:00etan Liburuan parte hartu dutenen testUen irakurketa eta Hatsakide batzuen kantu emanaldia bai eta Antton Larrandabururen kantaldia.

Egun osoan zehar "Margolariaren azietak ", Iñaki Bastarrika-ren pintura bilduma bat, aurtengo Hatsakideen 120 testutxoekin batera, azukre-kanaberazko 120 azietetan aurkeztua.

HATSAREN POESIA2022 ko PARTE HARTZALEAK

Abeberri Alan-Abruza Eneritz-Aiartza Peru-Aierbe Elena-Akixo Kepa Zigor-Aintziart Piarres-Albistur Ramon-Albistur Ramuntxo-Alzibar Eugeni-Amezaga Eneko-Amezaga Eneko-Antuñano Aitor-Apaolaza Eneko-Aranzeta Amaia-Aristi Pako-Arkotxa Aurelia-ArruabarrenaElizalde Marisa-Aurkerenena Joseba-Azkargorta Lierni-Azpeitia Roca Julen-Azpirotz Olatz-Babiano Mikel-Bastarrika Izagirre Iñaki-Bedaxagar Maider-Bella Andrea-Bezos Matxalen-BIDASOKO AEK (8 ikasle)-Blanco Josebe-Borda Itxaro-Davant Jean Louis-De Goñi Iosune-Dicharry Eric-Donibane Lohitzune AEK(7)-Dorronsoro Iñaki-Egiazabal Leonat-Egibar Ilazki-Eizmendi Juan Luis-Elortza Lierni-Errekatxo Ainhize-Etxamendi Eñaut-Etxarte Nicole-Etxebarria Mikel-Etxegoin Maialen-Etxezaharreta Lucien-Etxezarreta Lorea eta Unax-Fruchon Anne-Galardi Aintzane-Goitia Koldo-Gomez Itziar-Gorrotxategi Aritz-Gurrutxaga Joxan-Hormaetxe Hilario-Ibaibarriaga Urkiri Imanol-Irastortza Tere-Irazusta Aintzane-Irigoien Imanol-Irigoien Joan Mari-Irisarri Egia Estitxu-Iturain Goiz Eder-Iturrioz Andoni-Jimenez Maia Josu-Jorajuria Peio-Kazabon Antton-Laka Iban-Larramendy Jean-Larrandaburu Antton-Larruskain Aritz-Lasa Alegria Amaia-Leatxe Itsaso-Legarra Iraitz-Legarreta Asier-Lezoko OROITZENE AEK(7)-LizeagaTamayo Eukene-Lopez de Alda Arantzazu-Lopez Mugartza Juankar-Luzarraga Asel-Macklin Elizabeth-Maia Urroz Ainara-Maiztegui Maria Eugenia-Martinez Arantza-Meabe Miren Agur-Montes de Oca Alvaro-Odriozola Sustaeta Iñaki-Olaso Bengoa Xabier-Ordoñez Aiert-Oregi Sabin-Otamendi Jose Luis-Otero Lucia-Peillen Txomin-Rodriguez Fito-Salamero Andoni-Sarasola Murgia Juanma-Saratsua Oier-Sestorain Joxemari-Setien Gorka-Solorzano Graxi-Soubelet Xabi-rTaberna Mikel “Kapi”-Tambourin Marikita-Tisera Javier -Tobar Joseba -Felix-Traonmilin Eric-Urkia- Inza Maite-Urkizu -Urtzi-Urrutia- Xerar-Usandizaga Ainhoa-Valois Carmen-Zabala Artetxe- Juan Luis-Zabala - Zabala Telleria-Leire - Zabaleta Gorka-Zamora Auxtin-ZelaietaAnta Edu-Zendoia Joxemari-Zestau Bego-Zestau Ima-Zilbeti Eba-Zubeldia Koldo-Zubeldia Maddi-Zubiola -Ibon-Zugarramurdi Mariangeles-eta bere hiru bilobak-Zugasti Puri-Zurutuza Lander

HATSAREN POESIA EGUNA 2033/03/27

Ainara Maia Urrozen Kronika

SAHATSAREN ONDOAN

Iragan igandean eguzkia ere gonbidatu genuenez urteroko euskal poeton bilgunera elkarri hatsa emateko, hura ere agertu zen, eta egun osoz gozatu zuen gutarteko adiskidetasunaz eta poesiaz. Gutartean fisikoki ez zeudenak ere presente izan genituen, eta pittaka-pittaka biltzen hasi ginen saHATSAren inguruan… 50en bat pertsona! ETBko Iparraldeko Orena eta Euskadi Irratiko kazetaria den Irati Errandonea ere agertu zen gutartera, berak aurten parte hartu baitu HATSAREN POESIAn Bidasoko AEKko ikasle gisa.

Egun osorako jarri genuen Iñaki Bastarrikaren 120 azieta edo platerekin osatutako margo eta aurtengo HATSAREN POESIAren partehartzaileen hitzekin osatutako erakusketa ederra; eta eguerdian hasiera eman genion 2022ko Hatsaren Poesia liburuaren aurkezpenari. Aurten parte hartu duten 122 olerkarien hitzez bustiriko orriak aberasgarri eta hunkigarri zaizkigu, eta Auxtin Zamora hasi zen solasean azaltzeko Larraldea etxaldearen babesean hazi zaigun sahatsak zergatik egon nahi zuen gure artean, eta ez duela hiru urte leku berean landatu genituen gorostiak eta mizpirak. Seguruenik, sahatsa hitzaren barnean gure hatsa aurkitzen zuelako agertu zaigu ustekabean gure landarearen poesia, gu guztioi hatsa emateko, esperantza amini bat alegia.

122 olerkari Euskal Herri osoko nahiz euskal diasporako, tartean 35 berri, eta liburua atontzeko lanak hartu ditudanez, nik Ainara Maiak, esan nizuen akatsak akats liburu honetako poema bakoitza gonbidapen bat dela hartzeko eta irakurleak bere egiteko, eta horrela irakurle bakoitzak duen olerkia argiari eskaintzeko.

Aurtengo liburuaren sar-hitza idazteko gonbita Joseba Aurkenerenari zoriz egokitu zitzaion bezala, datorren urteko liburuaren sar-hitza Peio Jorajuriari egokitu zaio, eta jada erran dezakegu abian dela 2023ko Hatsaren Poesia!

Sahatsa gure artean zoriz eta ustekabean agertu zen, eta zoriz azken urteotako 24 aleen bilduma Bidasoako AEKri egokitu zitzaion opari, eta ondoren Marisa Arruabarrena poeta oriotarrak berak egindako giltzatako bereziak oparitu zizkigun aurten bildu ginenon artean, eta Antton Kazabon poeta oiartzuarrak ere bere liburu batzuk zozketa bidez oparitu zizkigun. Eskerrik asko zuen guztien eskuzabaltasunarengatik!

Aurkezpen-ekitaldiaren ondoren, taldearen argazkia atera zigun Beronika Zamorak, eta gero jan-edanak dastatzen hasi ginen elkarrekin hitz egiteko luze eta zabal. Aperitifaren ondoren, eguraldi eguzkitsua zela profitatuz, mahai biribiletan bazkaldu genuen Larraldearen aitzinean, eta lo-kuluxkaren orduan, bakoitza bere olerkiak errezitatzen eta kantatzen hasi ginen: Alan Abeberri, Piarres Aintziart, Aitor Antuñano, Eneko Apaolaza, Marisa Arruabarrena, Joseba Aurkenerena, Mikel Babiano, Iñaki Bastarrika, Matxalen Bezos, Bidasoko eta Lezoko AEK euskaltegietako ikasle zenbait eta euren irakasle Idoia Genua, Ilazki Egibar, Nicole Etxart, Maialen Etxegoin, Lucien Etxezaharreta, Lorea Etxezarreta eta haren semea Unax, Tere Irastotza, Imanol Irigoien, Josu Jimenez, Antton Kazabon, Antton Larrandaburu, Juankar Lopez Mugartza, Asel Luzarraga, Ainara Maia, Arantza Martinez, Sabin Oregi, Andoni Salamero, Graxi Solorzano, Marikita Tambourin, Eric Traonmilin, Auxtin Zamora, Eba Zilbeti eta Lander Zurutuza.

Antton Larrandaburuk, bere musika-taldeko lagun batekin batera, hiru kantu abestu zituen, eta arratsaldea musikaz blaitu zigun. AEKko nahiz Idazle Eskolako ikasleen presentzia oso estimatzekoa izan da, eta Tere Irastortzak present ez zegoen Koldo Zubeldiaren poema irakuri zuen bezala, Imanol Irigoienek bere anaia Joan Mariren poema ere irakurri zigun. Liburuaren bukaeran iaz presentzial egin ziren hiru poesia-tailerren emaitza poetikoak daude, eta iazko suHATSAren sugarrak pizturik segitzen duelako, heldu den apirilaren 4an hasiera emango zaio Auxtin Zamoraren aluminiozko artelanez eta iazko HATSAREN POESIA liburuko hitzez osatutako erakusketa poetikoari Iruñeko liburutegi nagusian. Bertan, izanen da Miren Agur Meabe poeta omendua, eta ondorengo asteetan Amaia Lasa, Itxaro Borda eta Juan Luis Zabalaizango dira han.

ARGAZKIAK

Josu Jimenez Maiaren argazki diaporama

Irakurleak

Bidasoako AEK Irungo Euskaltegikoak

Idazleen eskolakoak

Iñaki Bastarrikaren azietak

Parte hartzaleen liburuak

Miren Agur Meabe, Amaia Lasa,
Itxaro Borda , Juan Luis Zabala idazleen
hitzketa grabatuak hemen:

2022-4-4 Miren Agur Meabe
https://youtu.be/zWhTj8AU-R8
2022-4-12 Amaia Lasa
https://youtu.be/JUgmawNMUAI
2022-4-25 Itxaro Borda + Juan Luis Zabala
https://youtu.be/LeV4m_QVgA4

ESTREINALDIA /04/O4 Nafarroako Liburutegi nagusian

Miren Agur-Meaberekin 04/04/2022